मोफसल राजनीति

कतै सरकार चुकेको त छैन ?अव सिके राउतको समूहले स्वतन्त्र मधेसको लागि खुल्ला गतिविधि गर्न सक्ने

पाँचथर
स्वतन्त्र मधेशको पृथकतावादी आन्दोलन गर्दै आएको स्वतन्त्र मधेश गठबन्धन र सरकारबिच ११ बुँदे सहमति भएको छ । यो सहमति पत्रमा स्वतन्त्र मधेस गठवन्धनका तर्फवाट सिके राउतले तथा नेपाल सरकारका तर्फवाट गृहमन्त्री रामवहादुर थापाले हस्ताक्षर गरेका छन ।
स्वतन्त्र मधेस गठवन्धनका नेता तथा कार्यकर्ताहरुमा रहेको ज्ञान, सीप र सामथ्र्यलाई तराई–मधेस लगायत समग्र देशका जनता र राष्ट्रको शान्तिपूर्ण एवं लोकतान्त्रिक विकास र खुशहालीको लागि नयाँ उचाईका साथ सदुपयोग गर्न र सरकारको तर्फबाट स्वतन्त्र मधेस गठवन्धनप्रति लोकतान्त्रिक राजनीतिक शक्तिको रुपमा व्यवहार गर्न सहमत भएका छौं । सहमति पत्रमा भनिएको छ । यस्को अपव्याख्या गर्दै अव सिके राउत समूहले स्वतन्त्र मधेसका लागि जस्तोसुकै कृयाकलाप गर्न सक्नेछन ।

आज राष्ट्रिय सभागृहमा आयोजित कार्यक्रममा सो सहमति भएको हो ।

प्रधानमन्त्री केपी शर्मा ओलीको उपस्थितीमा गृहमन्त्री राम बहादुर थापा बादल र गठनबन्धनका अध्यक्ष सिके राउतले सहमतिपत्रमा हस्ताक्षर गरे।

सहमतिसँगै लोकतान्त्रिक विधिबाट समस्या समाधान गर्न गठबन्धन सहमत भएको छ ।

सरकारले सहमतिपत्रमा गठबन्धनका कार्यकर्तालाई लागेको राजनीतिक मुद्दा फिर्ता लिने र हिरासतमा रहेका कार्यकर्तालाई निःशर्त रिहा गर्ने उल्लेख छ ।

गठबन्धनका कार्यकर्ताले विगतमा गरेका राजनीतिक गतिविधीलाई भविष्यमा कार्वाहीको विषय नबनाउने, गठबन्धनका कार्यकर्तालाई नेपालभित्र बसोबास, जीविकोपार्जन र मूलधारको राजनीतिक गर्न अबरोध नगरिने पनि सहमति भएको छ ।

यस्तै १० भदौमा प्रहरी हिरासतमा मृत्यु भएका राउतका कार्यकर्ता राममनोहर यादवका परिवारलाई क्षतिपूर्ति र रोजगारीको व्यवस्था गर्नेमा पनि सहमति भएको छ ।

सहमतिको पूर्णपाठ यसप्रकार छ ।

सरकारआज २०७५ फागनु २४ गते सम्माननीय प्रधानमन्त्री केपी शर्मा ओली ज्यूको विशेष उपस्थितिमा राष्ट्रिय सभागृह, काठमाण्डौमा आयोजित विशेष समारोहमा नेपाल सरकार र स्वतन्त्र मधेस गठवन्धनका बीचमा देहाय बमोजिमको सहमति भएको छ ः

१. संघीय लोकतान्त्रिक गणतन्त्र नेपाल एक स्वतन्त्र, स्वाधिन, सार्वभौमसत्ता सम्पन्न, अविभाज्य राष्ट्र हो । नेपाल राष्ट्रको स्वतन्त्रता, स्वाधिनता, सार्वभौमसत्ता र अखण्डताको रक्षा गर्नु प्रत्येक नेपालीको कर्तव्य हो ।

२. हामी आफ्ना राजनीतिक, सामाजिक, आर्थिक लगायतका उद्देश्यहरु प्राप्तिका निम्ति शान्तिपूर्ण एवं लोकतान्त्रिक बाटोबाट अघि बढ्नु पर्छ भन्ने मान्यतामा दृढ छौं । नेपालको संविधानमा प्रयुक्त जनतामा निहित सार्वभौम अधिकारको प्रयोग गर्दै तराई–मधेस लगायत देशका कतिपय स्थानमा रहेका असन्तुष्टिहरुलाई जनअभिमतमा आधारित लोकतान्त्रिक विधिबाट समाधान गर्न सहमत भएका छौं ।

३. लोकतन्त्रमा मतभेदहरु हुन सक्छन् तर तीनिनहरुप्रति राज्य, राजनीतिक दल र आम नागरिक सहिष्णु हुनुपर्छ र त्यस्ता मतभेदहरुको समाधान पनि लोकतान्त्रिक विधिबाटै गरिनु पर्दछ भन्ने मान्यतामा दृढ छौं ।

४. सामाजिक न्याय, समानता र सद्भाव हाम्रो साझा उद्देश्य हो । हामी तराई–मधेस लगायत समग्र राष्ट्रका जनतालाई राजनीतिक, आर्थिक तथा सामाजिक दृष्टिले अधिकार सम्पन्न तुल्याउन र तराई–मधेस लगायत समग्र देशको विकासलाई दु्रत गतिमा अघि बढाउन प्रतिबद्ध छौं । त्यसैगरी संविधान प्रदत्त नेपाली जनताको सार्वभौम अधिकार, स्वायत्तता र स्वशासनको अधिकारलाई आत्मसात गर्न र तराई–मधेस लगायत समग्र देशमा सुशासन कायम गर्दै समानता र समाजवाद तर्फ अग्रसर हुन प्रतिवद्ध छौं ।

५. स्वतन्त्र मधेस गठवन्धनका नेता तथा कार्यकर्ताहरु माथि लगाईएको राज्य विरुद्धको अपराध लगायत सम्पूर्ण राजनीतिक मुद्दाहरु फिर्ता लिईनेछ र हिरासत वा कारागारमा रहेका सम्पूर्ण नेता तथा कार्यकर्ताहरुलाई निर्शत रिहा गरिने छ ।

६. स्वतन्त्र मधेस गठवन्धन तथा यसका नेता–कार्यकर्ताद्वारा यस अघि तयार पारिएका र पहिले प्रचारमा गएका किताव, पर्चा–पम्पलेट, घोषणापत्र, गीत, नक्सा, नारा, झण्डा, अनलाईन सामाग्री आदिलाई भविष्यमा कारवाहीको बिषय बनाईने छैन । आगामी दिनमा संविधानको व्यवस्था र यस सहमति प्रतिकूलका प्रचार सामाग्रीहरु उत्पादन तथा वितरण गरिने छैन ।

७. स्वतन्त्र मधेस गठवन्धनका नेता–कार्यकर्ता तथा समर्थकहरुलाई नेपालको संविधान प्रदत्त अधिकारको प्रयोग गर्दै नेपाल भित्र बसोबास गर्न, जीविकोपार्जन गर्न, संघसंस्था वा पार्टी खोल्न वा संगठित भएर मूलधारको राजनीति गर्न कुनै किसिमको अवरोध खडा गरिने छैन र त्यस्ता कृयाकलाप गरेवापत राज्यद्वारा कुनै प्रकारको कारवाही गरिने छैन ।

८. २०७५ भदौ १५ गते नेपाल प्रहरीको हिरासतमा मृत्यु भएका स्वतन्त्र मधेस गठवन्धनका बाँके जिल्ला संयोजक राममनोहर यादवको परिवारलाई राज्यको तर्फबाट उचित क्षतिपूर्तीका साथै परिवारका एक सदस्यलाई रोजगारीको व्यवस्था गरिनेछ ।

९. स्वतन्त्र मधेस गठवन्धनको आयोजनामा सञ्चालित आन्दोलनका क्रममा घाईते भएकाहरुको उपचारको जिम्मा सरकारले लिनेछ ।

१०. स्वतन्त्र मधेस गठवन्धनका नेता तथा कार्यकर्ताहरुमा रहेको ज्ञान, सीप र सामथ्र्यलाई तराई–मधेस लगायत समग्र देशका जनता र राष्ट्रको शान्तिपूर्ण एवं लोकतान्त्रिक विकास र खुशहालीको लागि नयाँ उचाईका साथ सदुपयोग गर्न र सरकारको तर्फबाट स्वतन्त्र मधेस गठवन्धनप्रति लोकतान्त्रिक राजनीतिक शक्तिको रुपमा व्यवहार गर्न सहमत भएका छौं ।

११. यो सहमति आजैका मितिबाट लागु हुनेछ ।

नेपाल सरकारको प्रतिनिधि स्वतन्त्र मधेस गठवन्धनको प्रतिनिधि

माननीय रामबहादुर थापा चन्द्रकान्त (सि. के) राउत
गृहमन्त्री संयोजक
२०७५ फागुन २४ २०७५ फागुन २४