विश्व

सिरियामा इस्लामिक स्टेटको हमलामा दुई सयको मृत्यु

सिरिया सरकारको नियन्त्रण रहेको दक्षिण पश्चिमी इलाकामा इस्लामिक स्टेटका लडाकूको श्रृङ्खलाबद्ध हमलामा परी कम्तीमा पनि दुई सय १५ को मृत्यु भएको स्थानीय अधिकारी र मानवाधिकार समूहले बताएका छन् ।

स्वास्थ्य अधिकारीका अनुसार इलाकाको मुख्य शहर स्वीदामा ५० भन्दा बढिको मृत्यु भएको छ । इस्लामिक स्टेट समूहले जिम्मेवारी लिएको उक्त हमलामा मृतकको संख्या दुईसय बढि हुनसक्ने विभिन्न संचार माध्यमले बताएका छन् ।

खबरका अनुसार हमलापछि शहरको पूर्वी हिस्सामा सरकार र चरमपन्थीबीच दोहोरो गोलीबारी भएको छ ।

सिरियाको सरकारले देशको दक्षिणी हिस्सामा बिद्रोहीको कब्जा भएको इलाकालाई पुनः नियन्त्रणमा लिनका लागि रुसको मद्दतमा हालै कारवाही सुरु गरेको थियो ।

संवाददाताका अनुसार इस्लामिक स्टेटको ताजा हमला, सरकारको नियन्त्रण भएको इलाकामा केही महिना यता अहिलेसम्मको सबैभन्दा ठूलो हमला हो ।

ब्रिटेनस्थित सिरियन अब्जरवेटरी फर ह्यूमन राइट्ले यो हमलामा कम्तीमा एक सय १४ जनाको मृत्यु भएको जसमध्ये ४० सर्वसाधारणबाहेक धेरैजसो सरकारका समर्थक लडाकु भएको जानकारी दिएको छ ।

संयुक्त राष्ट्रका अनुसार यो इलाकामा हिंसाका कारण कम्तीमा दुई लाख ७० हजार पलायन भइसकेको छन् ।

एजेन्सी